خۆڕاگری: نۆ هاووڵاتیی دەسبەسەرکراوی خەڵكی سنە، کە لە پێوەندی لەگەڵ ڕێورەسمەکانی نەورۆزدا لەلایەن ڕێژیمی ئێرانەوە دەسبەسەر کرابوون، بەشێوەی کاتیی و بەدانانی بارمتە ئازاد کراون.
بەپێی هەواڵی ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕۆژی شەممە، ١٦ی خاکەلێوەی ١٤٠٤ی هەتاوی، شنۆ محەممەدی، ئاریوان شاکری، شێروان حەیدەری، ئیدریس حەیدەری، مەحموود نادری، ئەسعەد باباکەرەمی، مستەفا هوژەبری، ئەحمەد ساعدی و سیروان حاتەمی، نۆ هاووڵاتیی خەڵکی شاری سنە و دەورووبەری، کە بەهۆی بەشداریکردندیان لە ڕێوەڕەسمی نەورۆزدا لەلایەن ڕێژیمەوە دەسبەسەر کرابوون، پاش زیاتر لە ١٠ڕۆژ دەسبەسەربوون، بەدانانی بارمتە و بەشێوەی کاتیی لە بەندیخانە ئازاد کراون.
ئەو هاووڵاتییانە کە هێندێکیان چالاکوانی مەدەنیی و ژینگەیین، لەسەرەتاکانی مانگی خاکەلێوەی ئەمساڵ، بەهۆی بەشداریکردن لە ڕێوڕەسمەکانی نەورۆز لەلایەن هێزە داگیرکەرەکانی ئیتلاعاتی ڕێژیمی ئیسلامیی ئێرانەوە دەسبەسەر کران و هەروەها بەشێکیشیان لە ماوەکانی ڕابردوودا چەندجارێکی دیکەش لەلایەن ناوەندە سەرکوتکەرەکانی ڕێژیمەوە دەسبەسەر کراون و پاش بە دانانی بارمتە ئازاد کراون، ئەمجارەش ئەو ٩ هاووڵاتییە بە دانانی بارمتە و بەشێوەی کاتیی تاکاتی دادگاییکردنەکەیان ئازاد کراون.
