خۆڕاگری: وەهاب خەدیریپوور، هاووڵاتیی خەڵكی مەهاباد، لەلایەن دەزگای قەزایی ڕێژیمی ئێرانەوە و سزای ١٠مانگ بەندکردنی بەسەردا سەپێندرا.
ڕۆژی پێنجشەممە، ١٤ی خاکەلێوەی ١٤٠٤ی هەتاوی، ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕایگەیاند: وەهاب خەدیریپوور، هاووڵاتیی خەڵكی شاری مەهاباد لەلایەن دادگای ئینقلابی ئیسلامیی ڕێژیمی ئێرانەوە بەتۆمەتی هاوکاریکردن لەگەڵ یەکێک لە حیزبە کوردستانییەکانی دژبەری ڕێژیمی ئیسلامیی ئێران، سزای ١٠مانگ بەندکردنی بەسەردا سەپێندرا و هەروەها ڕۆژی چوارشەممە، ١ی ڕەشەمەی ساڵی ڕابردوو، پاش ٣حەفتە ڕاگیران، بەشێوەی کاتیی ئازاد کرا.
ناوبراو لەماوەی دەسبەسەربوونیدا، لەمافی چاوپێکەوتن لەگەڵ بنەماڵەکەی و دەستپێڕاگەیشتن بە پارێزەر بێبەش کرابوو و ڕۆژی چوارشەممە، ١٠ی ڕێبەندانی ساڵی ڕابردوو، لەلایەن ئیتلاعاتی ڕێژیمەوە بانگ کرابوو بۆ ئەو ناوەندە سەرکوتکەرە و هەرلەوێ دەسبەسەر کرا.
