خۆڕاگری: ناسر هیمەتی، پزیشکی دەروونی، نووسەر، شاعیر و چالاکانی مەدەنیی خەڵکی ئاودانان، دوای بانگکردنی دادگای ئینقلابی ئیسلامیی ڕێژیم دەسبەسەر کراوە و پاش لێکۆڵینەوە بەشێوەی کاتیی ئازاد کرا.
ڕۆژی پێنجشەممە، ١٥ی سەرماوەزی ١٤٠٣ی هەتاوی، ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕایگەیاند: لەماوەی ڕۆژانی ڕابردوودا، ناسر هیمەتی، پزیشکی دەروونی، نووسەر، شاعیر و چالاکانی مەدەنیی خەڵكی شاری “ئاودانان”ـی سەربە پارێزگای ئیلام، لەلایەن دادگای ئینقلابی ئیسلامیی ڕێژیمەوە کە بانگ کراوە هەرکەوێ دەسبەجێ دەسبەسەر کراوە و پاش لێکۆڵینەوە و لێپێچینەوە بەشێوەی کاتیی و بە دانانی بارمتە ئازاد کراوە تاکاتی دادگاییکردنەکەی کە کاتیان بۆ دیاری کردووە دەبێ ئامادە بێ.
ناوبراو لەلایەن دەزگای قەزایی کۆماری ئیسلامیی ئێرانەوە چەند تۆمەتی وەکوو؛ سب النبی، چالاکیی تەبلیغی بەمەبەستی پشتڕاستکردنەوە و سەقامگیریی ئیسرائیل و سووکایەتیکردن بە خامنەیی دراوەتەپاڵ کە ئەگەری ئەوە هەیە سزای قورسی بەسەردا بسەپێندرێت و لە ئێستادا بەشێوەی کاتیی و بەدانانی بارمتەی قورس بە بڕی ١ملیاردتمەن ئازاد کراوە.
شایانی باسە کە، ئەو چالاکوانە بەهۆی چالاکییەکانییەوە لە تۆڕە کۆمەڵایەتییەکان لەلایەن ڕێژیمەوە هەڕەشە و لێپرسینەوەی لێکراوە و پێشووتریش لە تۆڕەکۆمەڵایەتییەکانیش بە نیشانەی پاڵپشتی لە خۆپیشاندانەکانی مانگی خەزەڵوەر و بەمەبەستی بانگهێشتی خەڵک بۆ بەشداریکردن لە ڕێوڕەسمی ٥ی بەفرانباری ساڵی ١٣٩٨ی هەتاوی، لەلایەن هێزە سەرکوتکەرەکانی کۆماری ئیسلامییەوە دەسبەسەر کرا.
