خۆڕاگری: فەرەیدوون سوڵتانی، هاووڵاتیی دەسبەسەرکراوی خەڵكی ناوچەی هەوشار، پاش زیاتر لە ١٠ڕۆژ دەسبەسەربوون بەشێوەی کاتیی و مەرجدار و دانانی بارمتە ئازاد کراوە.
بەپێی هەواڵی ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕۆژی چوارشەممە، ١٤ی سەرماوەزی ١٤٠٣ی هەتاوی، فەرەیدوون سوڵتانی هاووڵاتیی خەڵکی شاری “تیکاب”ـی سەربە ناوچەی هەوشار، دوای ١٢ڕۆژ ڕاگیران، بە دانانی بارمتەی٤٠٠ملیۆن تمەنی بەشێوەی کاتیی و بەو مەرجەی کە بۆ دەرەوەی شاری تیکاب سەفەر نەکات، تاکاتی دادگاییکردنەکەی ئازاد کراوە.
ناوبراو لە کاتی دەسبەسەرکردنیدا لەلایەن کۆماری ئیسلامییەوە، دەست بەسەر ماشێن و کەلوپەلە تایبەتییەکانیدا گیراوە و تائێستا بۆیان نەگەڕاندۆتەوە و هەروەها ڕۆژی یەکشەممە، ٤ی سەرماوەزی ئەمساڵ، پاش ٢ڕۆژ ڕاگیران لەلایەن ناوەندە سەرکوتکەرەکانی ڕێژیمەوە لە تیکاب ڕەوانەی گرتنگەیەکی ئیتلاعاتی کۆماری ئیسلامی لە ورمێ کرا و تائێستاش هیچ زانیارییەکی ڕاست و دروست لەسەر هۆکای دەسبەسەرکردن و چارەنووسی لە بەردەستدا نییە.
