خۆڕاگری: لوقمان ئەمینی، مامۆستای ئایینیی خەڵكی جوانڕۆ و پێشنوێژی مزگەوتی “چوار یاری نەبی”ـی سنە لەلایەن دەزگای قەزایی ڕێژیمی ئێرانەوە سزای ٣ساڵ و یەکمانگ بەندکردنی بەسەردا سەپێندرا.
ڕۆژی یەکشەممە، ٩ی خەرمانانی ١٤٠٤ی هەتاوی، ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕایگەیاند: مامۆستا لوقمان ئەمینی، چالاکی ئایینیی خەڵكی شاری جوانڕۆ و پێشنوێژی مزگەوتی “چوار یاری نەبی”ـی شاری سنە لەلایەن خانەی دادی تایبەت بە مامۆستایانی ئایینیی لە تاران بەتۆمەتی بێڕێزیکردن بە پیرۆزییەکانی ئیسلام، سزای سێ ساڵ و یەک مانگ بەندکرانی بەسەردا سەپێندراوە و هەروەها مۆڵەتی پێشنوێژیکردن و چالاکی ئایینیی لێوەرگیراوەتەوە.
ئەو سزایە کە بەسەر ناوبراودا سەپێندراوە، بەشێوەی یەکلایی و فەرمی پێی ڕاگەیەندراوە و هیچ ئەگەرێک لە ئارادا نییە پێداچوونەوەی پێدا بکرێت و ناوبراو بۆی نییە تانە لە سزاکەی بدات و هەروەها مامۆستا لوقمان لە کاتی شۆڕشی ژیناشدا لەلایەن ڕێژیمی ئێرانەوە دەسبەسەر کرابوو و لەوێش سزای ١١بەندکردنی بەسەردا سەپێندرابوو.
جێێ ئاماژەیە کە، مامۆستا لوقمان ئەمینی، ڕۆژی دووشەممە ۱ی بانەمەڕی ئەمساڵ، پاش بانگکردنی بۆ دادگای تایبەت بە مامۆستایانی ئایینیی لە هەمەدان دەسبەسەر و گوازرایەوە بۆ بەندیخانە و ڕۆژی دووشەممە ۱۲ی جۆزەردانی ئەمساڵ، پاش ۴۳ ڕۆژ بەندکردن، بەدانانی بارمتە و بەشێوەی کاتی لە بەندیخانەی هەمەدان ئازاد کرابوو و هەروەها پێشتر لەلایەن دادگای تایبەت بە مامۆستایانی ئایینیی ڕێژیم لە هەمەدان بەتۆمەتی هەڵگرتنی چەکی سووک، سزای پێنج ساڵ بەندکردن، بەتۆمەتی پڕۆپاگەندەی بەدژی حکوومەت، سزای ١ساڵ بەندکردن و لە پەیوەندی لەگەڵ تۆمەتی هاندانی خەڵک بۆ ئاژاوە و پاڵپشتی لە ناڕازییان، سزای پێنج ساڵ بەندکردنی بەسەردا سەپێندرابوو.
