خۆڕاگری: ئیسحاق بەهرامی، هاووڵاتیی خەڵكی جوانڕۆ زیکەی ٢٠ڕۆژە لەلایەن هێزە سەرکوتکەرەکانی ڕێژیمەوە دەسبەسەر کراوە و چارەنووسی ناڕوونە.
ڕۆژی شەممە، ٨ی خەرمانانی ١٤٠٤ی هەتاوی، ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕایگەیاند: ئیسحاق بەهرامی، هاووڵاتیی دەسبەسەرکراوی خەڵكی شاری جوانڕۆ، ماوەی ١٧ڕۆژە لەلایەن هێزە داگیرکەرەکانی ڕێژیمی ئیسلامیی ئێرانەوە دەسبەسەر کراوە و تائیستا چارەنووسی ناڕوونە و ناوەندە سەرکوتکەرەکانی ڕێژیم ڕێگرییان لە بڵاوکردنەوەی هەواڵی دەسبەسەرکردنی ئەو هاووڵاتییە کردووە.
ناوبراو ڕۆژی دووشەممە، ٢٠ی گەلاوێژی ئەمساڵ لەلایەن هێزە داگیرکەرەکانی ڕێژیمەوە کە بەبێ بوونی هیچ بەڵگەیەکی قەزایی و یاسایی هەڵیانکوتایە سەرماڵەکەیان، بەشێوەیەکی دڕەندانە دەسبەسەر کرا و گوازرایەوە بۆ شوێنێکی نادیار و سەرەڕای تێپەڕبوونی ١٧ڕۆژ بەسەر دەسبەسەرکردنیدا تائێستا هیچ زانیارییەکی ڕاست و دروست لەسەر هۆکاری دەسبەسەرکردن، شوێنی ڕاگیران و چارەنووسی لەبەردەستدا نییە و هەوڵ و بەدوداچوونی بنەماڵەکەشی بێئاکام ماوەتەوە.
