خۆڕاگری: کەیهان تەدبیری، مێرمنداڵی ١٧ساڵان و محەممەد نیکپەی، دوو هاووڵاتیی خەڵكی مەریوان لەلایەن چەکدارانی ڕێژیمی ئێرانەوە بەشێوەیەکی دڕەندانە دەسبەسەر کراون.
بەپێی هەواڵی ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕۆژی شەممە، ٢ی خاکەلێوەی ١٤٠٤ی هەتاوی، کەیهان تەدابیری، مێرمنداڵی تەمەن ١٧ساڵان و محەممەد نیکپەی، دوو هاووڵاتیی خەڵکی گوندی “نێ”ـی سەربە شاری مەریوان، لەلایەن چەکدارانی ڕێژیمی ئیسلامیی ئێرانەوە بەبێ بوونی هیچ بەڵگەیەکی قەزایی و یاسایی و بە بەکارهێنانی کردەوەی توندوتیژی دەسبەسەر کراون و گوازراونەتەوە بۆ شوێنێکی نادیار.
ئەو دوو هاووڵاتییە پاش دەسبەسەرکردنیان لەلایەن چەکدارانی ڕێژیمەوە، تا ماوەیەک بێسەروشوێن بوون، بەڵام دواتر دەرکەوت کە گوازراونەتەوە بۆ یەکێک لە گرتنگەکانی ڕێژیم لە شاری سنە و هەروەها تائێستا هیچ زانیارییەکی ڕاست و دروست لەسەر هۆکاری دەسبەسەرکرد و چارەنووسیان لەبەردەستدا نییە و هەوڵ و بەدوداچوونی بنەماڵەکانیشیان بێئاکام ماوەتەوە.
