خۆڕاگری: یازدە هاووڵاتیی خەڵكی سەردەشت کە دوومێرمنداڵیان لەگەڵ، بەهۆی بەشداریکردنیان لە ڕێورەسم نەورۆز لەلایەن چەکدارانی ڕێژیمی ئێرانەوە دەسبەسەر کراون.
بەپێی هەواڵی ئەنجومەنی زیندانییە سیاسییەکانی ڕۆژهەڵاتی کوردستان خۆڕاگری” ڕۆژی چوارشەممە، ٢٩ی ڕەشەمەی ١٤٠٣ی هەتاوی، دوو مێرمنداڵ بە ناوەکانی “شاکار عومەرزادە مێرمنداڵی تەمەن ١٠ساڵان و بڕیار محەمەدیانی مێرمنداڵی تەمەن ١٤ساڵان” لەگەڵ نۆ هاووڵاتی دیکەی خەڵكی شاری سەردەشت کە بریتین لە: “ئارام ئاڵی، کەماڵ قازانی، ڕەحیم قادری، کامران غەزاڵی، عوسمان عومەرنەژاد، شێرزاد شێخی، بێهزاد مەسڵەحەت، بێهروز هەمزەپوور و محەممەد حوسێنپوور” لەپێیوەندی لەگەڵ بەشداریکردنیان لە ڕێوڕەسمی نەورۆزی سەردەشت لەلایەن ئیتلاعاتی ڕێژیمی ئیسلامیی ئێرانەوە دەسبەسەر کراون.
ئەو هاووڵاتییانە پاش دوو ڕۆژ لێکۆڵینەوە و لێپێچینەوە، بەشێوەی کاتیی و بەدانانی بارمتە تاکاتی دادگاییکردنەکەیان لە بەندیخانە ئازاد کراون و هەروەها هاوکات دایکەی یەکێک لە شەهیدانی شۆڕشی ژینا بەناوی “عەزیزە حوسەینپوور” کە لە ڕێورەسمێکی تایبەتی نەورۆزاد ئاگری هەڵکردبوو، لەلایەن ئیتلاعاتی ڕێژیمەوە بانگ کرابوو بۆ ماوەی چەند کاتژمێرێک لێکۆڵینەوە و لێپێچینەوەی لەگەڵ کرابوو.
