بەڕێزان لە یەکێتی خوێندکارانی دێموکراتی کوردستان، خوێنکارانی بەهەڵوێستی کورد بە بۆنەی ١٢ی بانەمەڕ ڕۆژی خوێندکاری کورد گەرمترین پیرۆزبایتان پێشکێش دەکەین.
دەور و کاریگەری بزاڤی خوێندکاری و خەباتی بەردەوامی خوێندکارانی کورد لە قوناغە جیاوازەکانی بزووتنەوەی ڕزگاری خوازانەی گەلی کوردستان، لە لاپەڕەکانی مێژووی کورد، تا ئێستاشی لەگەڵ بێت دیار و بەرچاوە.
خوێندکارانی دەروەستی کورد لە زۆربەی بەستێنەکانی خەباتی ڕەوای گەلەکەمان هەم لە سەنگەری زانکۆ هەم لە مەیدانی خەباتی بە کردەوە دا پێشەنگایەتی ئەو خەباتەیان کردوە.شەهید”سمایل شەریفزادە” یەکێک لەو خوێندکارە دەروەست و بەلیمەتانە بوو کە لە قۆناغێکی دژوار و هەستیار دا لەگەڵ کۆمەڵیک لە خەباتگێڕانی ڕۆژهەڵاتی کوردستان دا سەرکردایەتی جوڵانەوەیەکی چەکداریان کرد و گۆمی مەندی ڕۆژهەڵاتی کوردستانیان هەژاند.هەرچەند لەو شۆڕشە کورت ماوە دا زۆربەی ئەو خەباتکارانە شەهید بوون، بەڵام لاپەڕەیەکی زێرینیان لە مێژووی بزووتنەوەی ڕزگاری خوازانەی گەلی کوردستان دا تۆمار کرد،کە لە بیر و زەینی هەموو تاکێکی کورد بە زیندوویی دەمێنیتەوە.
ئەنجومەنی زیندانییە سیاسییەکانی ڕۆژهەڵاتی کوردستان؛ وێڕای بەرز ڕاگرتنی یادی شەهید”سمایل شەریفزادە” بە بۆنەی ١٢ی بانەمەڕ ڕۆژی خوێندکاری کورد پیرۆزبایی لە هەموو خوێندکارانی دەروەست و بە هەڵوێستی کورد دەکەین و هیوای بەردەوامیتان لە خەبات و تێکۆشان لە پێناو دابین کردنی مافە نەتەوەیەکانی گەلەکەماندا بە ئاوات دەخوازین.
ئەنجومەنی زیندانییە سیاسییەکانی ڕۆژهەڵاتی کوردستان
١٢ی بانەمەڕی ١٤٠٣ی هەتاوی
