بەڕێزان؛ ئەندامانی یەکێتیی خوێندکارانی دێموکراتی کوردستان، لە لایەن ئەنجومەنی زیندانییە سیاسییەکانی ڕۆژهەڵاتی کوردستان بە بۆنەی بەستنی کونگرەی حەوتەمی ڕێکخراوەکەتان بە گەرمی پیرۆزبایتان لێدەکەین و هیوای سەرکەوتنتان بۆ بە ئاوات دەخوازین.
بەستنی کۆنگرەکەتان لەو دۆخە هەستیارە دا، نیشانەی گرینگیدانە بە کاری ڕێکخراویی و لە هەمانکاتدا ئەرک بەرپرسیارەتی قورسیش دەخاتە سەرشانی ئەندامانی ڕێکخراوەکەتان.
خوێنــدکارانی کورد لە دۆخی ئێستا دا ڕەســاڵەتێکی مێژوویــیان لەسەرشانە، کە بەشێوەیەکی ڕەخنەگرانە، هەوڵی گۆڕانــکاری بــدەن و بە داڕشتنەوەی ئەرک و بەرپرسیارەتی نوێ، کاریگەری خۆیان بگوازنەوە بۆ پانتایی کۆمەڵگا و ئەرکی پیشەیی خویان لە خزمەت بە نیشتمان و نەتەوەکەیان بەجێبێنن. خوێندکارانی کورد بە دەستڕاگەیشتن و تەیار بوونیان بە زانست و زانیاری سەردەم سەرمایەکی گرینگی کۆمەڵگەن کە وەک بژاردە و نوخبەی سیاسی و بەڕێوەبەری داهاتووی وڵات چاویان لێدەکرێت.
هەر بۆیە هیوادارین، ئێوە خوێندکارانی شۆڕشگێڕ لە کۆنگرەکەتاندا بە دانانی بەرنامە و پلانی تۆکمە شوێنپەنجەتان بەسەر ڕوداوەکانی کوردستانەوە دیار بێت.
ئیمە لە ئەنجومەنی زیندانییە سیاسییەکانی ڕۆژهەڵاتی کوردستان وێڕای دووپات کردنەوەی پاڵپشتی و کاری پێکەوەی هیوای سەرکەوتن بۆ کۆنگرەکەتان دەخوازین.
ئەنجومەنی زیندانییە سیاسییەکانی ڕۆژهەڵاتی کوردستان
ڕەزبەری ١٤٠٤ی هەتاوی
