٢ی ڕەشەممە، تەنیا ڕێکەوتێکی ئاسایی لە ساڵنامەی جیهانیدا نییە، بەڵکوو بۆ نەتەوەی کورد، وەرچەرخانێکی گرنگ و سەنگەرێکی مێژووییە بۆ دووپاتکردنەوەی شوناس و پاراستنی ئەو قەوارە فەرهەنگییەی کە زمانی کوردی تاقە کۆڵەکەی مانەوەیەتی.
لەم ڕۆژەدا، پێویستە سڵاوی ئەمەک و وەفاداری بنێرین بۆ ئەو تێکۆشەرە بوێرانەی کە لە پشت میڵەکانی زیندانەوە، بوونەتە پارێزەری ڕاستەقینەی وشە و ڕستەی کوردی. ئەو چالاکوانە مەدەنی و سیاسییانەی کە تەنیا لەبەر پەرەپێدان بە زمانی دایک و فێرکردنی ئەلفوبێی ئازادی، ئازادیی خۆیان لێ زەوت کراوە و لە گرتووخانەکاندا بە خۆڕاگرییەوە وانەی نیشتمانپەروەری دەڵێنەوە.
زیندان بۆ ئەم ئازادیخوازانە، نەک هەر نەبووەتە مۆڵگەی بێدەنگی، بەڵکوو کراوەتە قوتابخانەیەک بۆ قووڵکردنەوەی هزری نەتەوەیی. ئەوانەی لە ژوورە تاریکەکاندا، بە زمانی شیرینی کوردی بۆ ئاسۆیەکی ڕوون دەنووسن، سەلماندوویانە کە هیچ بەربەست و دیوارێک ناتوانێت ڕێگری لە لێشاوی وشەیەک بگرێت کە لە ناخی دایکی نیشتمانەوە سەرچاوەی گرتبێت.
ئێمە وێڕای بەرزڕاگرتنی ئەم یادە، پیرۆزباییەکی گەرم ئاراستەی سەرجەم ڕۆڵەکانی کورد دەکەین، بەتایبەتی دەستی ئەو مامۆستا و پارێزەرە خۆنەویستانەی زمانی کوردی دەگوشین کە لە سەختترین هەلومەرجدا و لەژێر گوشارەکاندا، نەیانھێشتووە ئەم چرایە کز ببێت.
سڵاو لەو زیندانییە سیاسییانەی کە زمانی کوردییان کردووەتە چەکی خۆڕاگری.
پیرۆز بێت ڕۆژی جیهانیی زمانی دایکی
ئەنجومەنی زیندانییە سیاسییەکانی ڕۆژهەڵاتی کوردستان
٢ی ڕەشەممەی ١٤٠٤ی هەتاوی
٢١ی فورییەی ٢٠٢٦ی زاینیی
