خۆڕاگری: فەردین مەولوودی، بەندکراوی سیاسیی پێشووی خەڵكی سنە، لەلایەن دەزگای قەزایی ڕێژیمەوە سزای ٥ساڵ بەندکردنی بەسەردا سەپێندراوە.
ڕۆژی شەممە، ٨ی سەرماوەزی ١٤٠٤ی هەتاوی، ژووری هەواڵی ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕایگەیاند: فەردین مەولوودی، بەندکراوی سیاسیی پێشووی خەڵكی شاری سنە و یەکێک لە دەسبەسەرکراوانی شەڕی ١٢ڕۆژەی نێوان ئێران و ئیسرائیل، لەلایەن لقی یەکی دادگای ئینقلابی ڕێژیمی ئێرانەوە بە سەرۆکایەتیی قازی مستەفا عەزیزی، بەتۆمەتی پێکهێنانی باند و گرووپ بەدژی ئاسایشی گشتی، سزای ۵ ساڵ بەندکردنی بەسەردا سەپێندرا.
دەزگای قەزایی ڕێژیم لەکاتێکدا ئەو سزایەی بەسەر ناوبراودا سەپاندووە کە ماوەی ٥مانگی ڕابردوو لە بەندیخانەدا بووە و بەهۆی نەخۆشییەوە توانای مانەوەی لە بەندیخانەدا نییە و کە ڕاپۆرتی پزیشکان ئاماژە بەوە دەکەن بەڵام بەرپرسان و دادگاکانی ڕێژیم گرینگی بە بارودۆخی بەندکراوان نادەن و هەروەها فەردین مەلوودی ڕۆژی شەممە، ٧ی پووشپەڕی ئەمساڵ لەلایەن هێزە سەرکوتکەرەکانی ڕێژیمی ئیسلامیی ئێرانەوە دەسبەسەر کرا کە پێشتر لانیکەم ۳ جار لەلایەن ناوەندە سەرکوتکەرەکانەوە دەسبەسەر کرابوو و دوو جار لەلایەن دەزگای قەزایی ڕێژیمەوە، سزای سێدارەی بەسەردا سەپێندرابوو.
