خۆڕاگری: پێنج هاووڵاتیی کورد لە شارە جیاکانەوە، ئێران و ڕۆژهەڵاتی کوردستان لەلایەن هیزە سەرکوتکەرەکانی ڕێژیمەوە بە بێ بوونی هیچ بەڵگەییەکی یاسایی دەسبەسەر و بێسەروشوێن کراون.
ڕۆژی شەممە، ٢ی ڕەشەممەی ١٤٠٤ی هەتاوی “٢١ی فوریەی ٢٠٢٦ی زایینی” ماڵپەڕی ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” لە ڕاپۆرتێکدا ڕایگەیاند: لە ماوەی ڕۆژانی ڕابردوودا بینج هاووڵاتیی کورد لە شارە جیاکانی ئێران و ڕۆژهەڵاتی کوردستان، لەلایەن هێزە سەرکوتکەرەکانی ڕێژیمەوە دەسبەسەر کراون و بۆ شوێنێکی نادیار گواستراونەتەوە و سەرەڕای تێپەڕبوونی ماوەیەکی زۆر هیچ زانیارییەک سەبارەت بە چارەنووس و شوێنی ڕاگرتنی ئەو هاووڵاتییانە لەبەردەستدا نییە.
– فەرشاد بەراتی، دەرگەزی خوراسانی ڕەزەوی ٥ی ڕێبەندانی ١٤٠٤هەتاوی ٢٥ی ژانویەی ٢٠٢٦زاینیی لەلایەن هێزە سەرکوتکەرەکانی ڕێژیم دەسبەسەر کراوە.
– کاروان سەبووری، ، خەڵکی کامێران،کە ڕێکەوتی ١٢ی ڕێبەندانی ١٤٠٤ی هەتاوی ١ی فوریەی ٢٠٢٦ی زاینیی لەلایەن هێزە سەرکوتکەرەکانی ڕێژیم دەسبەسەر کراوە تا ئێستا چارەنووسی دیار نییە.
– مالک نیک بەخت، خەڵکی کەلەکشای سەربە ایلام کە ڕێکەوتی ١٨ی بەفرانباری١٤٠٤ی هەتاوی ٨ی ژانویەی ٢٠٢٦ی میلادی لەلایەن هێزە سەرکوتکەرەکانی ڕێژیم دەسبەسەر کراوە.
– حسین مێهرئەنگیز، خەڵکی ئەسفراین سەربە خوراسان کە ڕێکەوتی ١٩ی بەفرانباری١٤٠٤ی هەتاوی ٩ی ژانویەی ٢٠٢٦ی میلادی لەلایەن هێزە سەرکوتکەرەکانی ڕێژیم دەسبەسەر کراوە.
شایانی باسە، دەستبەسەرکردنی سەرەڕۆیانە، بێبەشکردنی دەستبەسەرکراوان لە مافی پەیوەندیگرتن و دیارنەبوونی شوێنی ڕاگرتنیان، لەو پێشێلکارییە نایاساییانەن کە ڕێکخراوەکانی مافی مرۆڤ بەردەوام حکوومەتی ئێرانی پێی تۆمەتبار دەکەن.
