لێبوردنی نێونەتەوەیی داوای لە شوورای مافی مرۆڤی نەتەوەیەکگرتوەکان کرد کە نابێ ئێران پارێزراو بێ لە حاست جینایەتەکانی دژی مرۆڤایەتی و پێویستە سزا بدرێ.
لە چلەمین کۆبوونەوەی شوورای ماڤی مرۆڤی ڕێکخراوی نەتەوەیەکگرتوەکاندا، لێبوردنی نێونەتەوەیی بە پەسەندکردنی بڕیارێکی نووسراو داوای لە هەموو وڵاتانی ئەندام کرد کە دەبێ مەئمووریەتی ڕیپۆرتێری تایبەتی ڕێکخراوی نەتەوەیەکگرتوەکان لە بارەی مافی مرۆڤ لە ئێراندا دریژ بکرێتەوە و مژاری بێسەروشوێن کردنی زۆرەملی هەزاران چالاکی سیاسی و کوشتنیان لە هاوینی ساڵی ١٣٦٧ی هەتاویی تا ئەمڕۆ بە جیددی بخرێتە بەرباس و بەدواداچوونی بۆ بکرێ.
لەو نووسراوەیەدا ئاماژە بەوە کراوە کە کۆمەڵگەی نێودەوڵەتی کەمتەرخەمە لەو جینایەتە دژی مرۆڤانەیە کە تا ئێستاش درێژەی هەیە. لە کاتێکدا کە بێسەروشوێن کردنی زۆرەملی و شاردنەوەی شوێنی کوشتنی هەزاران کەس، بۆتە هۆی رەنج و خەم و گرفتاریی بنەماڵەکانیان و بەپێی یاسای نێونەتەوەیی ئەوەش شێوەیەکە لە ئەشکەنجە و کردەوەی بێرەحمانە و دژی ئینسانیی کە دەرهەق بە بنەماڵەی کوژراوەکان دەکرێ.
بێسەروشوێن کردنی ئینسانەکان بەپێی یاسا نێودەوڵەتییەکان تاوانێکی گەورەیە و پێویستە دەوڵەتی تاوانبار تەرمی کوژراوەکان بداتەوە بنەماڵەکانیان و ئەوانیش بەپێی فەرهەنگی خۆیان ڕیوڕەسمیان بۆ پێک بێنن.
کاربەدەستانی ئێرانی لە ساڵی ١٣٦٧ی هەتاویی دا هەزاران کەسیان لە چالاکانی سیاسی و جیابیران کە لە زیندان دابوون، بەپێی فتوایەکی نهێنی کە لە لایەن خومەینییەوە درابوو، بەشێوەیەکی نهێنی کوشت و تا ئێستاش لە چارەنووس و شوێنی قەتڵەکە هەواڵێکی ڕوون لە دەست دانییە. ئەوەندەی کە ئاشکرایە و باسدەکرێ ئەوەیە کە ئەو هەزاران زیندانییە بە کۆمەڵ کوژراون و گۆڕە بەکۆمەڵەکانیش کەوتوونەتە ژێر نەخشەی بیناسازی و جادە و شەقام و ویستوویانە شوێنی جینایەتەکە بشارنەوە.
دوای ٣٠ ساڵ کاربەدەستانی ڕێژیم هەر حاشا لەو جینایەتە دەکەن و هیچ زانیاریەک لە سەر شوێنی کوشتنی زیندانییەکان و ناو و نیشانیان باس ناکەن و نایاندەن بە بنەمالەکانیان و لە هیچ شوێنێکی ڕەسمیشدا ناویان تۆمار نەکراوە.
بنەماڵەی ئەو قوربانیانە ساڵانە ناڕەزایەتی خۆیان لەو جینایەتە دەردەبڕن و بە دوای تەرمی کەسوکاریاندا دەگەڕێن، بەڵام لە لایەن کاربەدەستانی حکوومەت نەک هەر هیچ زانیاریەک ناخرێتە بەردەست بنەماڵەکانیان، بەڵکوو بێڕێزیان پێدەکرێ و بۆ چاوترسێن کردنیان دەسبەسەر و زیندانی و ئەشکەنجە دەکرێن.
لێبوردنی گشتی داوا لە کۆمەڵگەی نێودەوڵەتی دەکا کە لە حاست ئەو کردەوەی ڕێژیمی کۆماری ئیسلامیی ئێران بێدەنگ نەبن و لە هەوڵی ئاشکرا کردنی گۆڕە بەکۆمەڵەکان و زانیاری دروست دابن و هەوڵبدەن کە کۆماری ئیسلامیی ئێران گۆڕە بەکۆمەڵەکان ئاشکرا بکا و تەرمەکان ڕادەستی بنەماڵەکانیان بکاتەوە.